ප්‍රාදේශීය ලේකම් කාර්යාලය - මිනුවන්ගොඩ

මිනුවන්ගොඩ ප්‍රාදේශීය ලේකම් කොට්ඨාශයේ සවිබල ගන්වන පවුල් සඳහා සමෘද්ධි සංවර්ධන දෙපාර්තමේන්තුවේ ප්‍රතිපාදන මත එක් නිවසකට රු.10,00000/- බැගින් ආධාර ලබාදී 2025 වර්ෂයේ ඉදිකළ නිවාස 03 ක් ජනතා අයිතියට පැවරීම හා 2026 වර්ෂයේ නිවාස 03 ක් ඉදි කිරීමට මුල්ගල් තැබීමේ අවස්ථාවන් 2026.07.15 දින සිට 2026.08.15 දක්වා ජාතික සවිබල මාසය තුල සිදු කරන ලදී.

එම අවස්ථාවට ගරු පාර්ලිමේන්තු මන්ත්‍රී රුවන්තිලක ජයකොඩි මහතා, ප්‍රාදේශීය ලේකම් තනූජා රාජකරුණා මහත්මිය, ප්‍රාදේශීය සභාවේ සභාපති අසංක මහතා ඇතුළු ප්‍රාදේශීය සභා මන්ත්‍රීවරුන් සහභාගී විය.

එමෙන්ම මෙම වැඩ සටහන අධීක්ෂණය කරන සමෘද්ධි මූලස්ථෘන කළමණාකරු ජේ.එච්.එම්. ජයපත්ම මහතා හා ව්‍යාපෘති කළමණාකරු බී.එම්.සී. බස්නායක මහත්මිය ද, අදාළ කලාප කළමණාකරුවන්, සමෘද්ධි සංවර්ධන නිලධාරින්, අදාළ ග්‍රාම නිලධාරීන්, ප්‍රජා සවිබල ගැන්වීම් නිළධාරීන් හා සමෘද්ධි සමාජ සංවර්ධන නිලධාරී රේණුකා දමයන්ති මහත්මියගේ සහභාගීත්වයෙන් මෙම වැඩසටහන සිදු කරන ලදී.

මිනුවන්ගොඩ ප්‍රාදේශීය ලේකම් තනූජා රාජකරුණා මැතිණියගේ උපදෙස් හා මඟ පෙන්වීම පරිදි  IEEE Computer Society Sri Lanka Chapter ආයතනයේ ස්වේච්ඡා සම්පත් දායකත්වය මත කාර්යක්ෂම කාර්යාල පරිපාලනය සඳහා AI මෙවලම් භාවිතා කිරීම හා සයිබර් ආරක්ෂාව පිළිබඳ  පුහුණු වැඩ සටහනක් 2026.06.08 දින ප්‍රජා සවිබල ගැන්වී‍මේ නිලධාරින් සඳහා ද 2026. 06.10 දින  ග්‍රාම නිලධාරින් හා ක්ෂේත්‍ර නිලධාරින් සඳහා ද  සාර්ථකව පැවැත්විණි.

මෙහිදී සම්පත් දායකයින් ලෙස මොරටුව  විශ්ව විද්‍යාලයේ තොරතුරු තාක්ෂණ දෙපාර්තමේන්තුවේ ජ්‍යෙෂ්ඨ කථිකාචාර්යවරයෙකු හා IEEE Computer Society Sri Lanka Chapter  හි Vice Chair ලෙස කටයුතු කරන ආචාර්ය තිලින තන්ත්‍රිවත්ත මහතා ද  ශ්‍රී ලංකා තොරතුරු තාක්ෂණ ආයතනයේ ජ්‍යෙෂ්ඨ කථිකාචාර්යවරියක හා  IEEE Computer Society Sri Lanka Chapter  හි Coordinator – women in Computing ලෙස කටයුතු කරන ශශිකා ලොකුලියන මහත්මිය ද ශ්‍රී ලංකා තොරතුරු තාක්ෂණ ආයතනයේ කථිකාචාර්යවරියක ලෙස කටයුතු කල වර්තමානයේ ආරක්ෂක අමාත්‍යාංශයේ සහකාර ලේකම් (පරිපාලන)  හා  IEEE Computer Society Sri Lanka Chapter  හි Assistant Secretary  ලෙස කටයුතු කරන පිපුණි විජේසිරි මහත්මිය ද මොරටුව විශ්ව විද්‍යාලයේ පශ්චාත් උපාධි අපේක්ෂකයෙකු වන රුක්ෂාන් ජේ. සේනානායක මහතා ද සම්බන්ධ විය.

රාජ්‍ය අංශයේ නිලධාරීන්ගේ ඩිජිටල් හැකියාවන් වර්ධනය කිරීම, නව තාක්ෂණයන් ඵලදායීව භාවිතා කිරීම හා තොරතුරු ආරක්ෂාව පිළිබඳ දැනුවත්භාවය ඉහළ නැංවීම මෙම වැඩසටහනෙහි මූලික අරමුණු ලෙස දැක්විය හැකිය.

බස්නාහිර පළාත් අධ්‍යාපන, සංස්කෘතික හා කලා කටයුතු අමාත්‍යාංශයේ ප්‍රතිපාදන යටතේ මිනුවන්ගොඩ ප්‍රාදේශීය ලේකම් තනූජා රාජකරුණා මහත්මියගේ උපදෙස් හා මඟ පෙන්වීම මත ප්‍රාදේශීය ලේකම් කාර්යාලීය ශ්‍රවණාගාරයේදී ගම් මැද්දේ ගී රස මීවිත මනෝ චිකිත්සාමය රසවින්දන වැඩ සටහන 2026.08.20 වන දින පවත්වන ලදී.

මෙහිදි මානසික යහපැවැත්ම ප්‍රවර්ධනය කිරීම උදෙසා කලා චිකිත්සාව තේමා කර ගත් උපදේශණ වැඩසටහනක් ප්‍රාදේශීය ලේකම් කාර්යාලයේ උපදේශණ නිලධාරි නිමාලි ප්‍රියංගනී පෙරේරා මහත්මියගේ සම්පත් දායකත්වය මත සිදු විය.

මේ සඳහා කොට්ඨාශයේ සංස්කෘතික බල මණ්ඩලය, ජ්‍යෙෂ්ඨ පුරවැසි සංවිධාන , කාන්තා බල මණ්ඩල මෙන්ම කාර්යාලීය නිලධාරීන් සහභාගී වූ අතර, එම නිලධාරින් විසින් ගීත ගායනය සිදු කරන ලදී.

මෙම වැඩසටහන මිනුවන්ගොඩ ප්‍රාදේශීය ලේකම් කාර්යාලයේ බස්නාහිර පළාත් සංස්කෘතික නිලධාරි කුමුදු ජයසූරිය මහත්මිය විසින් සංවිධානය කරන ලදී.        

මිනුවන්ගොඩ ප්‍රාදේශීය ලේකම් තනූජා රාජකරුණා මැතිණියගේ ප්‍රධානත්වයෙන් හා බෞද්ධ කටයුතු සමායෝජක පූජ්‍ය කළුඅග්ගල සරණසිරි ස්වාමීන් වහන්සේගේ  මඟ පෙන්වීම හා උපදෙස් මත වෙසක් මංගල්‍යයට සමගාමීව  සර්ව රාත්‍රික පරිත්‍රාණ ධර්ම දේශනයක් හා පසුදා උදෑසන ස්වාමීන් වහන්සේලා 50 නමක් උදෙසා සංඝගත දක්ෂිණාවක් 2026 ජූනි මස 05 සහ 06 යන දින වලදී මිනුවන්ගොඩ ප්‍රාදේශීය ලේකම් කාර්යාලයේ දී පවත්වන ලදී

මිනුවන්ගොඩ ප්‍රාදේශීය ශාසනාරක්ෂක බල මණ්ඩලයේ ගරු සභාපති හා ගරු ලේඛකාධිකාරි ස්වාමීන් වහන්සේලා ද, කොට්ඨාශයේ ජ්‍යෙෂ්ඨතම ස්වාමීන් වහන්සේලා ද මේ සඳහා වැඩම කරන ලදී.

මෙම කටයුතු සාර්ථකව ඉටු කර ගැනීම සඳහා කාර්යාලයේ සියළුම මාණ්ඩලික නිලධාරින්, කාර්යාලගත නිලධාරින්, ග්‍රාම නිලධාරින්, සමෘද්ධි සංවර්ධන නිලධාරින්,  ක්ෂේත්‍ර නිලධාරින් හා ප්‍රජා සවිබල ගැන්වීමේ නිලධාරින් සහයෝගය දක්වන ලදී.